雷陣雨 7月31日 星期二  

七月除了香港回歸之外,最高興嘅事莫過於我搵到新工作,能夠加入其士集團,我覺得好意外,我本身學歷唔算太高(其士基本要求大學學位),攞得一個爛鬼高級文憑,以一個Design Engineer嚟講實在太低,如果我唔係有七年工程嘅工作經驗,其士跟本就廢事理我......加入之後過左第一個七月份,感覺只係一般,大公司實在有太多同事,好難去識得哂全部,而且如果唔係為公事,真係搵唔到籍口去同其他部門接觸,又唔急得要慢慢嚟啦,反正我下定決心長做落去,時間多的是~

後記: 根據環保組織行星方舟估計，每年有數萬鯨魚、鳥類、海龜、海豹等給塑膠袋害死。

陣雨轉多雲 7月30日 星期一  

尋日星期日中午一點鐘走去游水水,今次諗住早些少去,去到可以冇咁迫人......一如所料,大池同副池加埋都唔夠三十人,第一時間當然唔係立即跳落水啦,要先做熱身運動,慢慢咁由雙腳落水,再到全身之後先到頭部,令身體嘅體溫得到充分時間嘅調節,落完水之後唔好即刻博老命咁死游爛游,除非好似我咁每keep住運動啦,如果唔係一陣間就手軟腳軟喇!

當所有人玩得興高采烈之際,突然泳池廣播話於副池發現嘔吐物,請副池裡所有游客立即上水,而當時我正好坐响池邊曬太陽,眼見其他游客好快就上哂水,之後一大群救生員就即刻進行清理,效率相當之高呀~

後記: 其實整個世界都是大染缸，會不會被染色，全靠自己。

多雲 7月29日 星期日  

每逢有咩大電影上畫,屯門四友都會選定星期六晚,齊齊即時欣賞大電影,早响一年前美國已經公佈真人電影版嘅變形金剛,當時真係估佢唔到,其實一D都唔奇,荷里活嘅電影特技已可做得到,加上2007年係變形金剛二十週年紀念,無疑係又可喜又可賀呀! 尋晚終於都睇完變形金剛大電影喇,比我想像中要出色多十倍,正正係2007年最佳電影之冠(在我心目中),由於套變形金剛係香港人做翻譯,所以戲裡面嘅人物名稱依舊保留,值得令人懷念當然係博派與狂派之爭,而兩派嘅大佬分別係柯柏文與麥加登,仲有大黃蜂&星星叫,簡直令人回味細路仔時代嘅集體回憶,希望有續集咁就好喇(太貪心了)~

後記: 一位名教育家說過，學生今日對他的觀感如何，他不介意，但他極願意知道他們十年後對他的觀感如何。好父母對於子女的期望也是如此。

晴朗 7月27日 星期五  

近幾日有個不明來電時時打嚟,係冇來電顯示嘅,所以我一於唔理佢,由個手機響到爆,順便聽下歌仔都唔錯,但係今日我終於都忍無可忍,聽一次到底係邊鬼個啦,成日打嚟佢唔煩我都煩呀! 原來只係one2free打嚟,話返比我知我份合約就快到期,我冇聽錯應該係八月廿一號,條客戶服務員係個男人(好可惜),仲以為係條女服務員......聲到係把男聲即時冇哂耐性,條友問我有冇時間,我就反問佢想講咩先,之後佢就話繼續用one2free就會每個月送返50個同台短訊,為期一年,我跟住話是但啦而家好忙(幾現實),條友再講一大堆廢話之後我就收線喇~

後記: 大部分人需要的，只是一套適合自己身體與生活習慣的飲食計畫。

無風 7月26日 星期四  

幾日之前問過同事有關clam車費嘅事宜,一問之下都係同其他公司差唔多,先攞份報車費表,其實咪即係交通報告表,所有行蹤一目了然,份表我今日先至攞到手,跟手copy幾份啦,份表頂頭有幾行字仔,好細好細隻,要用天眼通先睇得到嘅,原來份表係以三個月交一次嘅形式,對於我地design department嚟講無影響呀,又唔係時常咁出去,落地盤d師傅就啱d......

突然有位女同事走嚟同我講,話你到底知唔知道要交日報表比我,佢話仲未收到喎,我根本就完全都唔知道有件咁嘅事,第一日返日都冇人提過,另一份表又隨即攞到手喇,呢份日報表係我最最最討厭嘅,每日做d咩工作都要寫低,連時間都要好清楚咁交代,以後都幾難偷懶喇~

後記: 寵物對主人的愛是真誠、忠心、無條件的，對孩子在感情上有非常良好的影響。

晴 7月25日 星期三  

第二次出街做嘢,地點依然都係AIA Tower,正確嚟講當然就係恆基嘅總部啦,上去廿八樓見工程師,入到去見到兩三個靚女,忍唔住望左好多次,之後好順利咁就改哂份圖,仲有最重要係比工程師簽名,跟住就齊齊上B.D.喇! 傾完一大輪學術性嘅廢話之後,終於都可以還返份圖比B.D.,而我嘅任務就完畢喇,不過依然都要返公司做嘢,冇計啦,今朝諗住出一出去好快返,點知出一出去就一日喇,我d身家性命財產全部放响公司,咁我當然要返去攞啦~

後記: 寵物是孩子的玩伴，也是他們心靈上的朋友、最佳聆聽者。

晴 7月24日 星期二  

原本今晚預算唔會寫blog,因為今晚收工太夜嘅關係,加上左右手都麻痺哂,不過個心又好想記低今日嘅事,所以都係快快手咁寫啦! 寫完仲要食晚飯呀......今朝如常咁返公司改圖,改改下阿頭走埋嚟同我講,叫我做D好急嘅嘢先,其實又係一份又一份嘅A1圖,睇嚟都係離唔開罰抄嘅惡夢喇......今次份圖成一百二百張,真係多到嘔血呀,唯有頂硬上啦,好好彩今次有人同我一齊改,一直改圖改到九點幾,我終於都到極限,即刻收工搭巴士鬆人,其實份圖仲未改得哂,係一半都未改完呀......唯有聽朝再繼續啦~

後記: 照顧另一個生命，能訓練耐性、仁慈、紀律及專注等。

大暑 7月23日 星期一  

今日真係好鬼熱,但係對我冇乜影響,返工搭巴士必定係冷氣巴......冇計,返到公司一定要開冷氣......冇計,放工搭巴士又係冷氣巴......冇計,最後返到屋企,終於都返到一個冇冷氣嘅地方,大自然嘅風係最舒服嘅,一日十幾個鐘頭都响有冷氣底下嘅環境下生活工作,長久落去只會令自己嘅身體過於依賴冷氣,到時候危機就會一發不可收拾!

當然冷氣係人類最好嘅發明之一,而且我都好鍾意涼冷氣,如果每日坐長途巴士冇冷氣,咁就真係冇覺好瞓喇......而公司係一個工作嘅地方,如果工作環境炎熱,跟本無法專心工作,所以有必要開冷氣嘅......當返到屋企就自己衡量一下,係咪真係有需要,才好走去開冷氣,因為開冷氣之後實在太涼爽喇,跟本上就唔會去考慮灯冷凍,而且開得一晚就會長期開落去,依賴從此產生出嚟~

後記: 讓年幼孩子幫忙照顧寵物，可令他們自小懂得負起責任的重要──忘記餵寵物吃東西，是會把牠們餓死的。

晴轉多雲 7月22日 星期日  

之前有幾個朋友跟我過相同嘅說話,就係話"你咁醒搵工使乜驚呀,搵到工之後就一齊返大陸happy啦!" 起初我信到十足十,直到搵到新工之後第一個禮拜六,冇人提起過呢件事......等到第二個禮拜六,都係冇人提起呢件事......等到第三個禮拜六,依然冇人提起過呢件事......最後我廢事再等落去,再等我就真係個傻仔喇! 冇人去我咪自己一個人去囉,又唔使死嘅,一個人有一個人嘅好處,唔使受其他人影響,鍾意去邊度就去邊度,雖然係幾悶下,但係對於唔多出聲嘅我嚟講,都唔算叫做好悶啦......深圳地鐵嘅皇崗站原來開通左,可惜B出口嘅往香港方向仲未開關,搞到我要行返過去皇崗口岸過關~

後記: 存爭勝的心，會使你只求勝利，不講道理。即使勝了，也要不露驕矜之色。

晴 7月20日 星期五  

我發現公司有樣嘢好有趣,就係公司d同事們有形無形之間分成兩派,我叫活躍一派做狂派,靜焗一派叫做博派......有形就係佢地通常會分開兩派去食飯,起初我要同博派其中一位同事夾住跟project,所以一到食飯時間,佢一定會叫埋我去,我當然照跟去啦,認識過博派一個禮拜之後,原來佢地好少會傾計,幾句之後就dead air......今日轉轉口味,跟狂派食一次lunch,感覺完全唔一樣,幾條爛仔坐埋一齊先有計傾嘛,食完飯之後仲齊齊煲煙,it's feel good~

後記: 說理不像說理--說理時，宜像閒話家常，朋友聊天。